බස්නාහිර මුහුදු තීරය දිගේ ගාල්ලට යන්න එනවද අපිත් එක්ක....... 01

විවිධ සංචාරක සටහන් අතරේ මේ වගේ කතා මාලාවන්ද ලියන්නට මම බලාපොරොත්තු වෙනවා.... මම එහෙම අදහස් කලේ කොළඹ ඉඳන් ගාල්ලට වෙරළ තීරය දිඟේ යන එක එක ලිපියකින් කියලා ඉවර කරන්න අමාරු නිසයි.....  කොහොමත් ඔබ කවුරුත් දන්නවනේ කොළඹ ගාල්ල පටන් ගන්නේ ගාලු මුවදොර පිටියෙන්..... ඉතින් අපි එතන ඉඳන් යන්න පටන් ගමු....

ගාලු මුවදොර පිටියේ දසුන්

ගාළු මුවදොර පිටිය අපේ රටේ තියෙන සුන්දරම හා ඓතිහාසික ස්ථානයක්.... විදේශිකයින් අපේ රට ආක්‍රමණය කල කාලයෙ සිටම පැවතෙන මෙම ගාළු මුවදොර රටේ වැදගත් මෙන්ම එම සමයේ එල්ලා මැරීම් හා ප්‍රසිද්දියේ වෙඩි තබා මැරීම් වැනි දඬුවම් ලබා දීමටද භාවිතා කර තිබෙන බවටත් සාක්ශි හමුවී තියෙනවා.. කෙසේ වෙතත් අද දිනයේ රාජ්‍ය උත්සව පැවැත්වීමටත් භාවිතා කරන්නේ මේ ස්ථානයයි.. සුංදර හවස්වරුව පුරාවට හිරු බැස යන අයුරු නරඹමින් විනෝද වීමට දේශීය විදේශික ජනතාවගේ ආදරය ගාළු මුවදොර පිටියට එක් රැස් වීම වර්තමානයේ ඉතා සුලභ දසුනක්.....ගලධාරී හෝටලය, සිලෝන් කන්ටිනන්ටල් හෝටලය, ටාජ් සමුද්‍රා හෝටලය හා ඉතා පෞරාණික වටිනාකමකින් හෙබි සුප්‍රසිද්ධ ගාළුමුවදොර හෝටලයද තිබෙන්නෙත් මේ ගාළු මුවදොර පිටිය අසලමයි...

ගාළු මුවදොර පසු කර ඉදිරියට යනවිට අපට මුණ ගැසෙන්නේ කොළඹ නගරයේ අසිරිමත් පෙදෙසුයි.... කොළඹ 3 සහ කොළඹ 4 ලෙසින් දැන් හැදින්වෙන කොල්ලුපිටිය හා බම්බලපිටිය නගරයි.... කැසිනෝශාලා, රාත්‍රී සමාජශාලා  මෙන්ම සාප්පු සවාරියේ යාමටද කදිම ප්‍රදේශයක් තමයි මේ පෙදෙස. ඉතා ජනප්‍රිය වෙළඳ සංකීර්ණ දෙකක් වෙන ලිබර්ටි ප්ලාසා හා මැජෙස්ටික් සිටි නමින් හැදින්වෙන වෙලඳ සංකීර්ණ දෙක පිහිටා තිබෙන්නෙත් මේ ප්‍රදේශයේ....

ඊලඟට හමුවෙන්නේ වැල්ලවත්ත..... එහෙම නැත්නම් කොළඹ 06 කියන ප්‍රදේශය... මෙයද ඉතා ජනාකීර්ණ හා රථ වාහන තදබදය නිතර පවතින ප්‍රදේශයක්... සුන්දර මුහුදු තීරයකට උරුමකම් කියන වැල්ලවත්ත කොළඹ නගර සීමාවට අයත් සුංදරම මුහුදු තීරය වෙනවා... උදේ සහ හවස වරුවල ව්‍යායාම්වල යෙදීම සඳහා මෙන්ම විනෝද වීමට පැමිනෙන පිරිස් වලින්ද, පෙම් සුව විඳීමට පැමිනෙන පෙම්වතුන්ගෙන්ද වැල්ලවත්ත මුහුදු තීරය පිරී ඉතිරී යනවා... මසුන් මැරීම විනෝදාංශය කරගත් දේශීය විදේශීය සංචාරකයින්ටද මෙම මුහුදු තීරය ඉතා සුදුසු ස්ථානයක්.....

මීලඟට හමුවෙන්නේ දෙහිවල නගරය... දෙහිවල හන්දියෙන් වමට හැරී කරගම්පිටිය හන්දියෙන් නැවත වමට හැරී කිලෝමීටරයක් දුරක් ගියාට පස්සේ තමයි අපේ රටේ ජාතික සත්වෝද්‍යානය හමු වෙන්නේ.... දේශීය මෙන්ම විදේශීය සතුන් බොහොමයක් ඔබට මෙහිදී නරඹන්න පුළුවන්.... රූපවාහිනියෙන් පොත්පත් වලින් පමණක් ඔබ දැකපු සතුන් පිය ඇසින් බලන්න එන්න මෙතනට.... 

ගල්කිස්ස මුහුදු වෙරලේ දසුන්..

දෙහිවල පසුකර ඉදිරියට යද්දි තම්යි ඔබට ලෝ පරසිදු ගල්කිස්ස මුහුදු තීරය හමු වෙන්නේ..... දවසේ පැය විසි හතර පුරා ජනාකීර්ණ ස්ථානයක් සහ ඉතාම ලස්සන වෙන මෙම මුහුදු තීරය ඉතාම විනෝදජනක මුහුදු තීරයක්... ඉන්දියන් සාගරයේ පිහිනන්න, ජලක්‍රීඩා කරන්න, අව්ව තපින්න, වෙරලේ ක්‍රීඩා කරන්න, වගේම මත්පැන් බෝතල් සමඟ සතුටුවෙන්නත් මෙතනට ලොකු පොඩි දේශී විදේශීය සංචාරකයෝ අපමණ පැමිනෙනවා.... සුන්දර ආදර කථාවක ඉතිහාසය රැගත ගල්කිස්ස මහ හෝටලයත් පිහිටා තිබෙන්නේ මෙම මුහුදු තීරයේ හරි මැදමයි....

මීලඟට ඔබට හමු වෙන්නේ රත්මලාන මොරටුව, පානදුර නගරයන්..... සුන්දර බොල්ගොඩ වැව මොරටු ගඟ ආදී අලංකාර වටපිටාවක් වගේම නාගරීකරණය වූ සමාජ වටපිටාවක්ද ඔබට දැක ගත හැක.... ඊට පසු ඉතාම අලංකාර සහ නිශ්ශබ්ද වෙරළ තීරයකට ඔබට පිවිසිය හැකියි.. ඒ තමයි වාද්දුව වෙරල තීරය.... නිස්කලංක වෙරල තීරයක් වූ මෙහි ඊට සමගාමීව පිහිටා ඇති පොල් ඉඩම් නිසා තවත් ආකර්ශනීය වෙනවා.... තරු පහේ හෝටලයක් වුන බ්ලූ වෝටර් හෝටලය, වාද්දුව නිවාඩු නිකේතනය, විලා ඕශන් වීව් හෝටලය වගේ ඉතාම ලස්සන සංචාරක හෝටල්ද පිහිටල තියෙන්නේ වාද්දුවේ....

එහෙමනම් ගාල්ල බලා යන ගමනේ පළමු කොටස මින් අවසන් වෙනවා... සඳහන් කරපු තැන් ගැන වැඩි විස්තර දැනගන්නා හා ඒ අවට ඇති හෝටල් වගෙම මෙහි සඳහන් නොකල හෝටල් වෙන්කරවා ගැනීමටත් පහත අංක අමතන්න..එසේ නැතිනම් පහත සදහන් ලිපිනයට විද්‍යුත් ලිපියක් එවන්න.... 

මීලඟ ලිපියෙන් කළුතර සිට බලපිටියට යමු.....  

දුරකථන        : +94714449162

                     +94112178209

විද්‍යුත් තැපැල් : abeetha@explorelankainternational.com

 English Translation  

 දෙවන කොටස 

රොකී ක්ලිෆ් ලී බංගලාවට යන්න එන්න....

අද කියන්නේ වැඩ කරලා මහංසි වෙලාවක නිවාඩු පාඩුවේ ගිහින් මනස සැහැල්ලු කර ගන්න පුළුවන් ඉතා අපූරු නිවාඩු නිකේතනයක් ගැනයි... පුංචි කඳු ගැටයක් මැද්දේ හුදකලා වෙච්ච ලී බංගලාවක ලංතෑරුම් එක්ක රාත්‍රියක් ගත කරන්න ආසද? ආලින්දයට වෙලා තරු ගනින්න..... ඈත කඳුවලින් දිස්වෙන පුංචි පුංචි විදුලි එළි නිවෙන පත්තු වෙන හැටි බලන් ඉන්න..... එහෙනම් මෙන්න ඒ තැන ගැන විස්තර.. නම රොකී ක්ලිෆ් වුඩ්න් බන්ගලෝ (Rockey Cliff Wooden Bungalow).....

ඔන්න කොටේජ් එක ගැන විස්තර... මේ ලී කොටේජ් එක, එක් කාමරයකින් විසිත්ත කාමරයකින්, ආලින්දයකින්, කෑම කාමරයකින් හා කුස්සියකින් සමන්විතයි... දෙදෙනෙක්ගේ සිට හයදෙනෙක් දක්වා ඉතා සුව පහසුව නවතින්න පුළුවන්.... පිරිමි ළමයි කණ්ඩායමක් වගේ නම් දහදෙනෙකුට වගේ නවතින්න පුළුවන්... ඊට අමතරව කූඩාරම් වල අවශ්‍ය තරම් නවතින්න පුළුවන්...

ආහාර ප්‍රශ්ණය නේද? කෑමට අදාල කළමණා ගිහින් දුන්නම එතන බලාගන්න අය ඔබට ආහාර පිළියෙල කරලා දෙයි.. හරි හරි...., බයිට් එහෙමත් හදලා දෙයි..ඒත් බඩු ටික අරන් යන්න... බත් සහ එළවළු සහිත කෑම වේලක් සහ තෝසෙ ඉට්ලි වගේ දමිළ කෑමකට අවශ්‍ය කළමණා අරගෙන යනවනම් මට ඔබට විශේශයෙන් යමක් කියන්න ඕන... ඒ ඉතාම රහට සැකසූ අහාර වේලක් භුක්ති විඳින්නට ඔබට හැකිවේවි.... 

ඊලඟට මොකක්ද දැනගන්න ඕන.. ආ.. සනීපාරක්ෂාවද? ප්‍රධාන ලී කොටේජ් එක සඳහා ඉතා පිරිසිඳු වැසිකිලියක් හා නාන කාමරයක් තියෙනවා... කූඩාරම්වල ඉන්න අය සඳහා පිරිසිඳු වැසිකිළි පහසුකම් වගේම විවෘත නාන වතුර මල් සවි කරලා තියෙනවා... දිය නෑම සඳහා ලස්සන පිහිල්ලක් වගේම දිය ඇල්ලක්ද ඉඩමේ කෙලවරක පිහිටා තියෙනවා...

හරි.. දැන් ආලෝකය... කිසිදු විදුලි බල්බයක් නෑ... ලැන්තෑරුම් හා ගෑස් ලාම්පු ඔබේ අඳුර මඟ හරවාවි... සෑම ඇඳකම තියෙන විඳුලි පන්දම හදිසි අවශ්‍යතාවයකට ඔබ ලඟ හිඳීවි. ඔබගේ බැටරි අඩු වෙච්ච ජංගම දුරකතන රාත්‍රියේ ස්විචය ඕෆ් කර භාර දුන් පසු උදේට චාජ් කර දෙන්න එතන කාර්ය මණ්ඩලය කටයුතු සලසා දේවි...

.

එහෙ ගිහින් බලන්න තියෙන්නෙද? කොත්මලේ ජල විදුලි වැඩසටහන වගේම ඉහල කොත්මලේ ජල විදුලි වැඩසටහනත් නැරඹීමේ හැකියාව තියෙනවා... මහනුවරට කිලෝ මීටර 40කින් පමණ ලඟාවිය හැකි නිසාත් නුවර එළියට කිලෝමීටර 30කින් පමණ ලඟා විය හැකි නිසාත් ඒ ආශ්‍රිත ප්‍රදේශ නැරඹීමේ හැකියාව තියෙනවා.... මේ කොටේජයේ නවාතැන් ගන්න ඔබට අත්පන්දු, බැඩ්මින්ටන් වැනි එළිමහන් ක්‍රීඩාවලත් චෙස්, කැරම් වැනි ගෘහස්ත ක්‍රීඩාවලත් යෙදීමේ පහසුකම තියෙනවා.... ඊට අමතරව පා පැදියක නැගී ප්‍රදේශය පුරා සංචාරය කිරීමේ අවස්තාවක්ද ලබා ගත හැකියි.. වනය තුල පා ගමන් මෙන්ම කුරුල්ලන් නැරඹීමටද පහසුකම් සලසා තියෙනවා... ඊට අමතරව ධීර ක්‍රියාකරකම් සහිත විශේෂ පැකේජයක්ද ඔබට සුදානම් කර ගන්න පුළුවන්.... 

දැන් ඉතින් ගාස්තුව නේද? මෙහි නැවතීමට පමණක් එක රාත්‍රියකට රුපියල් 7500.00ක මුදලක් අය කරනවා.... කූඩාරම් ගහගෙන ඉන්නවනම් එක් අයෙක්ගෙන් රුපියල් 500.00ක මුදලක් අය කරන්න තමයි තීරණය කරලා තියෙන්නේ.. කූඩාරම් සංකල්පය කෙරේ එනවානම් අඩුම තරමේ පස් දෙනෙක්වත් පැමිණිය යුතුයි. මීට අමතරව විශේෂ සේවාවන් සඳහා එක් එක් අය කිරීම් තීරණය වෙනවා... උදාහරණයක් ලෙස මධු සමය ගත කරන්නට එන පාරිභෝගිකයින්ට විශේෂ වට්ටම් මෙන්ම ධීර ක්‍රියාකාරකම් (Adventure Activities) සඳහා එන අයටද සුවිශේෂ පැකේජයන් ලබා ගත් හැකියි.

වැඩි විස්තර දැනගන්න ඕනනම් හෝ මෙය වෙන් කරවා ගැනීමට අවශ්‍යනම්  දුරකථන අංකය තමයි.... 0714449162.

 English Translation 

කැළණි ගඟ දිගේ ඩිංගි බෝට්ටු පදින්න යන්න එන්න......

ඉතාමත් කාර්ය බහුලව ගෙවිච්ච පසුගිය කාලය නිසා ඇත්තටම මේ බ්ලොග් එකේ පෝස්ට් එකක් දාන්න ප්‍රමාද වූ බව කිව යුතු වෙනවා.... මේ මාතෘකාව දැක්ක සැනින් ඔබට  මතක් වේවි කොහෙද ලංකාවේ මෙහෙම දෙයක් කරන්නේ තියෙන්නේ කියලා..අටුවා ටීකා වැඩක් නෑ.. තැන තමයි කිතුල්ගල. මගේ අත්දැකීම්වලට අනුව මම හිතන්නේ කිතුල්ගල තමයි එක් දින චාරිකාවක් යන්න ලංකාවේ හොදම තැන... ප්‍රාග් ඓතිහාසික යුගයට අයත් බෙලි ලෙන, ඔස්කාර් සම්මාන ලද චිත්‍රපටයක් වූ "ද බ්‍රිජ් ඔන් ද රිවර් ක්වායි" චිත්‍රපටයේ පසුතලය හා එහි නටබුන්, පහත රට තෙත් කලාපීය වනබිම්, අලංකාර තේ වතු හා රබර් වතු ආදීන්ගෙන් සුසැඳි කිතුල්ගලට සංචාරකයින් ප්‍රධාන වශයෙන් ඇදෙන්නේ කැළණි ගඟ ආශ්‍රිතව වූ ධීර ක්‍රියාකාරකම් නිසයි.

ඉතින් කිතුල්ගල යන අය වෙනුවෙන් තමයි මේ ලිපිය ලියැවෙන්නේ.... කිතුල්ගලට ප්‍රවිශ්ඨ වෙන්න ප්‍රධාන මාර්ග හතරක් ගැන සඳහන් කරන්න පුළුවන්..... කොළඹ හා බස්නාහිර මුහුදු තීරය මෙන්ම දකුණේ ජීවත් වෙන අයටත් ලේසිම මාර්ගය වෙන්නේ අවිස්සාවේල්ලට ඇවිත් කරවනැල්ලෙන් දකුනට හැරිලා යටියන්තොට පසු කරමින් කිතුල්ගලට ලඟාවීම... කුරුණෑගල කෑගල්ල ආදී ප්‍රදේශ වගේම අනුරාධපුර පොලොන්නරුව ත්‍රීකුණාමලය වගේම යාපනය පැත්තේ ඉන්න අයටත් ලේසි පාර වෙන්නේ කෑගල්ල, ගලිගමුව, රුවන්වැල්ල පසු කර කරවනැල්ලෙන් වමට හැරී යටියන්තොට පසු කර කිතුල්ගලට ලඟාවීමට හැකි මාර්ගයයි.... නුවර ගම්පොල මාතලේ  අයටනම් නාවලපිටිය හරහා ගිනිගත්හේනට ඇවිත් දකුනට හැරෙන එක තමයි ලේසි. ඒ වගේම මධ්‍ය කඳුකරය හා ඒ ආශ්‍රිත අයට පුළුවන් හැටන් හරහා ගිනිගත්හේනට ඇවිත් වමට හැරී කිතුල්ගලට ලඟා විය හැකියි...

කිතුල්ගල බෙලි ලෙන

ඉස්සෙල්ලාම කතා කරමු බෙලි ලෙන ගැන.. අවුරුදු 25000ක් පමණ අතීතයකට හිමිකම් කියන බෙලි ලෙන මධ්‍ය ශිලා යුගයට (මෙසොලිතික යුගය..)අයත් වෙන බවක් තමයි සඳහන් වෙන්නේ... ඉතා විශාල ලෙන් තුනකින් සමන්විත මෙහි ප්‍රධාන ලෙන අඩි හැටක ප්‍රවිශ්ඨ දොරටුවකින් මෙන්ම අඩි 40ක උසකින් යුක්තයි.... බෙලි ලෙනේ ඉහල සිට බෙලි ලෙන පාමුලට ඇද හැලෙන සිහින් දිය ඇල්ල මීට එක් කරන්නේ අපූරු අලංකාරයක්. දැනට කරන ලද කාබන් පරීක්ෂණ වලට අනුව පුද්ගලයින් 30 දෙනෙකුගේ පමණ කොටස් හමුවී ඇති බව පවසයි....

ඊලඟට මම කියන්න හදන්නේ ලෝ සුපතල ඉංග්‍රීසි චිත්‍රපටයක් වෙච්ච ද බ්‍රිජ් ඔන් ද රිවර් ක්වායි චිත්‍රපට පසුතලය ගැනයි... දැනටත් එම ස්ථානය ආශ්‍රිතව වැල් පාලමක් තියෙනවා.. දෙවෙනි ලෝක යුද්ධය හා ගෙතුනු චිත්‍රපටයක් වෙච්ච මෙය 1957දී තමයි තිරගත වෙලා තියෙන්නෙ.. ඔස්කාර් සම්මාන 7කට මෙන්ම තවත් සම්මාන රාශියකට උරුමකම් කී මෙම චිත්‍රපට පසුතලයෙන් දැනට ඉතිරි වී ඇත්තේ පාලම ඉදි කිරීම සදහා සවිකල විශාල යකඩ කොකු හා හෑරූ විශාල වලවල් පමණයි....

මීලඟට එහි පරිසර පද්ධතිය.... පහතරට තෙත් කලාපීය වනබිමක අසිරිය දැක ගත හැකි අතර, මීමින්නන් වල් ඌරන් වැනි සිව්පාවුන් ගහනයි.... ලංකාවට පමණක් ආවේණික කැහිබෙල්ලා සහ රතු දෙමලිච්චා වැනි පක්ෂීන්ද අං කටුස්සා වැනි සතුන්ද දැකගන්නට ඔබට හැකියාව තියෙනවා... ඕලු ඇල්ල සහ දිය කෙලියටම සැදුන ගල් වලක්ද තිබෙන වන තුරුලිය හමුවේ සැරි සැරීමද ඇත්තටම සොඳුරු අත්දැකීමක්....

කැළණි ගඟේ සැඩ පහර දිගේ ඩිංගි බෝට්ටු පැදීම (White Water Rafting) තමයි වර්තමානයේ කිතුල්ගල තියෙන ජනප්‍රියම අංගය..... කිලෝමීටර හතරක දුරක් විනාඩි 45ක් පමණ ගමන් කරන මේ ත්‍රාසජනක චාරිකාව ඇග හිරිවට්ටන අත්දැකීමක්.... ආරක්ෂිත කබා (Safety Jackets) මෙන්ම ආරක්ෂිත හෙල්මට් (Safety Helmets) පැළඳීමද අනිවාර්යයි.... මාරන්තික පිමි හතරක් පනිමින් බෝට්ටුවෙන් වැටී සැඩ පහර හා පොර බඳිමින් විනෝදයෙන් මේ ගමන යන්න ඔබට හැකිවේවි... බෝට්ටුවට ගොඩ වී විනාඩි පහක් යනතෙක් "ඇයි මම මේකට නැග්ගේ" කියා ඔබට සිතේවි....  විනාඩි දහයක් යනවිට "මේ ගමන මොන තරම් මිහිරිදැයි" සිතේවි... වැල් පාලම යටින් යන ඔබට අවස්ථාවක් ඒවි බෝට්ටුවෙන් බැස ගඟේ පාවෙන්නට.... එයත් ඉතා සුංදර මෙන්ම ත්‍රාසජනක අවස්ථාවක්.... අඩි 40ක් පමණ ගැඹුරු වතුරක ඔබ සැහැල්ලුවෙන් පාවෙනවා (Body Rafting) දැනෙන විට ඔබට ඇත්තට පුදුම සිතෙවි...... මෙම අත්දැකීම විඳින්න ඔබ ආසයි ඒත් භයයි කියලා අපි දන්නවා.... අපිත් එක්ක එකතු වෙන්න සහතිකලත් ජීවිතාරක්ෂකයින් සමඟ මේ ගමන යන්න එන්න...

එහෙනම් කිතුල්ගල ගැන ලියැවෙන පුංචි ලිපිය මම මෙයින් නවත්තන්නම්.. එහෙනම් කිතුල්ගල යන්න... අපිත් එක්ක එකතුවෙන්න.... මෙන්න තියෙනවා විස්තර..

දුරකථන : 0112178209

විද්‍යුත් තැපැල් : abeetha@explorelankainternational.com

 English Translation 

අප්‍රේල් මාසයේ සුන්දර සිරි වඩන නුවර එළියෙ සැණකෙලි සිරි...... - පළවන කොටස

සීතල නුවර එළිය නගරය අප්‍රේල් මාසයේදී සැණකෙලි සිරි ගැනීම ඉතා ප්‍රසිද්ධ කරුණක්... අප්‍රේල් මාසයේ දී එළැඹෙන සිංහල හා හිංදු අළුත් අවුරුද්දත්, පාසැල් නිවාඩුවත් කියන හේතු දෙකම නිසා නුවර එළිය නගරය සංචාරකයින්ගෙන් පිරිලා ඉතිරිලා යනවා..... පුංචි එංගලන්තය ලෙසින් විරුදාවලිය ලැබූ නුවර එළිය ගැන අවධානයෙන් සිටින විදේශිකයොත් මේ කාලෙදි අපේ පුංචි දිවයිනට පය තබනවා... ඉතින් මේ පැමිනෙන දෙස් විදෙස් සංචාරකයින් නිසාත් මල් පිපෙන බක් මහත් නිසා මලින් පිරී ගිය සුන්දර නුවර එළියට අයත් සංචාරක ස්ථානයන්හි සුන්දරත්වය දෙගුණ තෙගුණ වීම ඉතා සාමාන්‍ය කරුණක්... 

නුවර එළියට පිවිසෙන මාර්ගයන් ප්‍රධාන වශයෙන් හතරක් තියෙනවා.... 

උතුරින් එනවානම්  නුවර සිට ගම්පොල, පුස්සැල්ලාව හරහා නුවර එළියටත්.. 

බටහිරින් එනවානම් ගිනිගත්හේන, හැටන්, තලවාකැලේ හරහා නුවර එළියටත්..

දකුණින් එනවානම් බණ්ඩාරවෙල, වැලිගම හරහා නුවර එළියටත්

ඔබ එන්නේ නැගෙනහිරින් නම් හඟුරන්කෙත, රාගල හරහා නුවර එළියටත් 

ඔබට ප්‍රවිශ්ඨ විය හැකි අතර මේ මාර්ගයන් හතරම එක සේ සුන්දර බවද කිව යුතුම වෙයි...

රම්බොඩ දිය ඇල්ල, ගැරඬි ඇල්ල, කොත්මලේ ජලාශය නරඹමින් ඔබට එන්න ලැබෙන්නේ ගම්පොල සිට නුවර එළිය දක්වා දිවෙන මාර්ගයේදියි.... මේ රම්බොඩ දිය ඇල්ල ගැන යමක් මෙහිදී කිව යුතුමයි.. මොකද මෙහි නියම ස්වරූපය ගොඩාක් සංචාරකයින් දකින්නේ නෑ.... රම්බොඩ දිය ඇල්ල කොටස් තුනකින් යුක්තයි... මීටර් 100ක් විතර උසැති පළවෙනි කොටස වනය තුල ඇද හැලෙන අතර දෙවෙනි කොටස ඔබට ලඟින්ම දිස් වෙන්නෙ පාරට ඉතා ආසන්නවයි.... නුවර දෙසින් යනවිට වම් පැත්තෙන් මීටර් තුනක් පමන උසින් වෙන්නේ ඒ දෙවෙනි කොටසයි.... බොහෝ සංචාරකයින් රම්බොඩ ඇල්ල කියා නරඹන්නේ මෙම දිය ඇල්ලයි.... නමුත් මාර්ගයෙන් දකුනු පස බැලූ කල නුඹට පෙනේවි... ඔබ ඉන්නේ ඉතා විශාල දිය ඇල්ලක මුදුනෙහි බව... ඒ තමයි රම්බොඩ දිය ඇල්ලේ තුන්වෙනි කොටස හා ලස්සනම කොටස... එය බලන්න යන්න මාවතක් තියෙන්නෙ ඊට ටිකක් පහලින්...අවට අයගෙන් විමසුවොත් දැකගන්න පුළුවන්....

ලබුකැලේ තේ කර්මාන්ත ශාලාව හමුවෙන්නේ රම්බොඩ පහු කරලා පොඩ්ඩක් නුවර එළිය දෙසට ගියාම... ඉතා නැවුම් තේ කෝප්පයක රස බලන්නත්, සුපිරි තත්වයේ තේ කර්මාන්ත ශාලාවක් නරඹන්නත් ඔබට අවස්තාව උදා කරගන්නට පුලුවන්.... අනතුරුව වංගු සහිත මාර්ගයක් ගමන් කරමින් නුවර එළියට ලගාවෙන්න ඔබට හැකිවේවි...... මෙම මාර්ගයනම් සුපිරියි.... ඒ නිසා ඕනෑම වාහනයකට පහසුවෙන් නුවර එළියට ලඟාවිය හැකියි...

ඊලඟට කතා කරන්නේ අවිස්සාවේල්ලේ සිට ගිනිගත්හේන කපොල්ල හරහා වැටුනු හැටන් තලවකැලේ මාර්ගය ගැනයි....  කොළඹ සිට හැටන් දක්වා මාර්ගය මනා ලෙස සකසා ඇතත් හැටන් සිට නුවර එළිය දක්වා ගමන නම් මදක් දුෂ්කරයි... ඕනෑම වාහනයකට ගමන් කිරීමේ හැකියාව ඇතත් මාර්ගයේ තිබෙන දුෂ්කරතාවය නිසා මඳක් ප්‍රමාද වීම බලාපොරොත්තුවෙන් ගමන් කිරීම තමයි කල යුත්තේ.....

පලවෙනි සුන්දර නැවතුම වෙන්නේ කිතුල්ගල... තොටුපළින් නාලා එහෙම ගමන පිටත් වුනහැකි... කැලණි ගඟේ සීතල වතුර බිංදු ගතට එක්කරන්නේ නැවුම් ජීවයක්... ගිනිගත්හේන පසු කරනකොට බැලූ බැලූ අතින් සුංදර දිය පහරවල්.... ඒ හැම එකකම ඉතා පිරිසිදු ගලායන ජලය ඔබට දකින්න පුළුවන් වේවි... ගිනිගත්හෙන පොලීසිය ගැනත් යමක් කිව යුතුයි.... එහි වහලය අපූරුයි.. වම් පැත්තේ වහලයට වැටෙන වැසි ජලය එකතු වෙන්නේ ලංකාවෙ දිගම ගඟ වෙච්ච මහවැලි ගඟට... දකුණු පැත්තේ වහලට වැටෙන වැසි වතුර එකතු වෙන්නේ තවත් ප්‍රධාන ගංගාවක් වන කැළණි ගඟ වෙතට.... 

මේ මාර්ගයේදී දැකිය හැකි සුංදරම දසුන් තමයි ඩෙවෝන් දිය ඇල්ල හා ශාන්ත ක්ලෙයාර් දිය ඇල්ල... උසින් වැඩි ඩෙවෝන් දිය ඇල්ලත් පලලින් වැඩි ශාන්ත ක්ලෙයාර් දිය ඇල්ලත් සංචාරකයන්ට මනරම් දසුනක් වනවාට කිසිදු සැකයක් නෑ.... ඒ විතරක් නෙවෙයි..ඒ අසලම තියෙන ශාන්ත ක්ලෙයාර් තේ හලෙනුත් නැවුම් තේ උගුරක රස බලන්න ඔබට පුළුවන් වේවි..... තලවකැලේ, නානු ඔය පසු කරමින් ග්‍රෙගරි වැවට මුහුන ලා ඔබ නුවර එළියට පිවිසේවි....  

ඉන් පසුව අපේ අවධානය දිනාගන්නේ දකුණු දෙසින් නුවර එළියට ප්‍රවිශ්ඨ වන මාර්ගයයි... මෙයත් වර්ථමානයෙදී බොහෝ අබලන් වෙලා තමයි තියෙන්නේ.. අබලන් කියනවට වඩා ප්‍රතිසංස්කරණය වන පාරක් නිසා දැන් ගමන් කිරීම දුෂ්කරයි කියන එක තමයි නිවැරදි... සුන්දර බණ්ඩාරවෙල පුරවරය පසුකරමින් ඉතාම අලංකාර මාර්ගයක ගමන් කරන්නට ඔයාලට හැකි වෙනවා මෙහිදී... 

අනෙක් මාර්ග වලට සාපේක්ශව එළවලු කොටු දකින්න ලැබීමත් විශේෂයක්.... වසන්ත සමය වර්ණවත් කරමින් තරගෙට සුපිපුන මල් වලින් හැඩ වෙච්ච හග්ගල උද්භිද උද්‍යානයත් ඔයාලට හමු වෙන්නේ මේ මාර්ගයේ ගමන් ගන්නකොට.... හාවා එළියේ වනාන්තරවල මායිම දිගේ පැමින නුවර එළියට පිවිසෙන්න ඔබට හැකිවේවි....

හඟුරන්කෙත, වලපනේ සහ රාගල හරහා වැටී තිබෙන මාර්ගය එතරම් ජනප්‍රිය නොවූ මාර්ගයක්.. නමුත් එහි සුන්දරත්වයේ නම් කිසිඳු අඩුවක් නෑ... මෙහි තිබෙන විශේෂත්වය හැටියට මම දකින්නේ නුවර එළිය කිට්ටුවට එනකම්ම ඔබ බලාපොරොත්තු වන සීතල අත්විදින්න නොහැකි වීමයි.... ලවර් ස්ලීප් දිය ඇල්ල වගේම පීඩෲ තේ වතු යායත් ලංකාවේ ලොකුම තේ පදුරත් ඔබට දකින්න ලැබෙන්නේ මේ මාර්ගයෙන් නුවර එළියට ගමන් කරද්දි....

මාර්ග ගැන විස්තර අවසන්.... වසන්ත කාලෙට නුවර එළියෙ ඇවිදින්න යන්නෙ කොහෙද කියන කරුණු ගැන දැන ගන්න ඊලඟ ලිපියෙන් හමුවෙමු....

වැඩි විස්තර 0714449162 අභීත

 English Translation 

මෙන්න පළවෙනි පෝස්ට් එක...

ශ්‍රී ලංකාව හරිම පුංචි රටක්... ඒක පුරා ඇවිදලා සංචාරය කරන්න ඔබට සෑහෙන කාලයක් යාවි.... ලියන මම අභීත එදිරිසිංහ.. එක්ස්ප්ලො(ර්) ලංකා ඉන්ටනැෂනල් පුද්ගලික සමාගමේ කළමණාකාර අධ්‍යක්ෂ ලෙස සේවය කරනවා... ශ්‍රී ලංකාව පුරා ඔබ නොදන්න මම නොදන්න ගොඩාක් දේවල් සැගවිලා ඇති.. අපි ඒවා හොයාගෙන යනවා.... ඒ තොරතුරු හැම එකක්ම අපි ඔයාලට හෙලි කරන්න බලාපොරොත්තු වෙනවා... ඒ විස්තර පහත අයුරින් මෙහෙමයි... සිංහල ලිපි ඉංග්‍රීසියට පරිවර්තනය කරලා දෙන තවත් බ්ලොග් රචිකාවියක් වන ජනනි නංගිටත් මගේ ස්තූතිය මේ වෙලාවෙදි පුද කරන්නත් ඕන....

ශ්‍රී ලංකාවට සංචාරක ව්‍යාපාරය හරහා හිමි වෙන්නෙ පුදුම තැනක්... ලෝකයේ ප්‍රසිද්ධම රූපවාහිනී නාලිකාවක් වන ට්‍රැවල් ඇන්ඩ් ලිවින් කියන නාලිකාව කියන විදිහට ලෝකයේ සංචාරය කරන්න සුදුසු රටවල් වලින් දෙවැනි තැන හිමිවෙන්නෙ ශ්‍රී ලංකාවට... ඔබ දන්නවාද හේතුව? පැය හතරක් ඇතුළත ලෝකයේ ඕනෑම කාළගුණික තත්ත්වයකට ලඟාවිය හැකි එකම රට ශ්‍රී ලංකාව පමණයි..... ඉතින් අපේ උරුමය හා අසිරිය රැගත් සංචාරක විත්ති ඔබ වෙත ගෙන එන්නට පටන් ගන්නෙ අපරිමාන සතුටකින් යුක්තවයි....

ශ්‍රී ලංකාවේ සංචාරක අතින් වැදගත් වන ස්ථාන..

ඒ වෙත ලඟා විය හැකි ආකාරය...

ප්‍රවාහන තොරතුරු...

හෝටල් පිළිබඳ තොරතුරු....

වැනි වැදගත් තොරතුරු වගේම ඔබට දැනගත යුතු සංචාරක තොරතුරු සම්භන්ධයෙන්ද අපෙන් විමසීම් කළ හැකියි....

මෙම බ්ලොග් අඩවිය සම්භන්ධ පූර්ණ අනුග්‍රහය එක්ස්ප්ලෝ(ර්) ලංකා ඉන්ටර්නැෂනල් පුද්ගලික සමාගම  ( Explore Lanka International (Pvt.) Limited) දරනු ලබන අතර ඔබගේ සංචාරක ක්ෂේශ්ත්‍රයට අදාල ව්‍යාපාරයන් වේ නම් ඒ සඳහා ද මෙහි ඉඩක් වෙන් කිරීමට බලාපොරොත්තු වෙමි....

0094714449162 කියන දුරකථන අංකයෙනුත් 

info@explorelankainternational.com කියන විද්‍යුත් ලිපිනයෙනුත් ඔබට මේ පිළිබඳ තවත් තොරතුරු නැරඹිය හැකි වෙයි...

 English Translation